ÁNO VÊLO, ÁNO NÔVO

Unga áno intremente ta sai,

Lôgomente otrunga ta goelá.

Áno vêlo tá virá costa vai,

Áno nôvo qui azinha ta intrá.

Vida azinha-azinha corê,

Sã dia co mêz ligéro passá.

Gente antigo, susto di morê,

Pensá qui Mundo ta perto cavá.

Pôde vai co diabo, bicho traquino,

Áno oitênta quatro savanado.

Lembrá rabixá um-cento mufino

Pa azinha aguá co vôs juntado.

Olá êle batê asa aguá,

Nôs sintí qui mundo nádi saiám;

Tudo pauchong qui gente lô quimá,

Sã pa mundo nom têm consumiçám

Quim tá ánsia vai savaná azar,

Quim ta sacudi vento-suzo mau;

Ancuza galado, pinchá na mar,

Pa tirá saván di nôsso Macau

Áno vêlo, vôs bêm di buliçoso,

Já buli co nôs na estunga vânda.

Vôs já ficá unchindo mapeçoso,

Sã merecê Chaca-sa sarabânda.

Calistro, ispalhá fome na mundo,

Trazê qui tânto lágri di margura.

Esperánça di bom dia já vai fundo,

Inguiçado pa um-cento diabura.

Qui di ódio crecê na coraçám

Di gente qui vivo dizesperado

Na unga mundo fêto di vilám,

Co assi tánto pobre iscravizado.

Nhu-nhum ta rico querê más riquéza,

Nom-têm fim de olá saco inchido.

Gente pobre sã morê na pobrêza,

Cavá passá su vida consumido.

Tánto inocente onçôm pagá

Pecado di nhu-nhum dismazelado.

Qui vêlo, qui quiança já definhá,

Na casa-casa qui nom-têm telado.

Áno nôvo, lembrá trazê bom vento

Pa pôde suprá mufinaze vai.

Nunca-bom intrá co pê azarento,

Pa fazê mundo tropeçá pê cai.

Vêm co paz pa nôsso gente sofrido;

Pa quim fome, ne-bom isquecê pám,

Vêm co frescura di jardim florido,

Vêm co amôr pa tudo coraçâm.

Pa tud'alma qui ta vivo na treva,

Sandê unchinho di luz pa lumiá.

Pa tudo coraçám qui sã ta reva,

Vêm passá páno mimoso limpá.

Co graça di Céu, vôs vêm raganhado,

Pa ispaliá amôr, paz co bondade.

Vêm filiz, ficá justo, abençoado,

Pa tudo coraçám di bô vontade

- Poema em Pátua de José Ferreira dos Santos